ملڪي ترقي جو دارومدار نوجوانن تي آهي، نوجوانن کي ئي هن ملڪ جي تقدير بدلائڻي آهي: عطاءُ الله تارڙ

اسلام آباد – 22 – آگسٽ (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته ملڪي ترقي جو دارومدار نوجوانن تي آهي، نوجوانن کي ئي هن ملڪ جي تقدير بدلائڻي آهي، پاڪستان جي بنيادن ۾ شهيدن جو رت شامل آهي، پاڪستان کي قيامت تائين قائم رهڻو آهي. هايئر ايجوڪيشن ڪميشن جي اهتمام هيٺ نيشنل يوٿ ڪنوينشن کي خطاب ڪندي اطلاعات واري وفاقي وزير چيو ته اسان جي 60 سيڪڙو آبادي 30 سالن کان گهٽ عمر جي نوجوانن تي ٻڌل آهي، هجرت جدوجهد جو حصو هوندي آهي، اهو سمجهڻو پوندو ته پاڪستان جي تخليق جو سبب ڪهڙو آهي، جدا ملڪ جي لاءِ تحريڪ به نوجوانن شروع ڪئي هئي جنهن ۾ نعرو لڳو هو ته ”ونڊجي رهندو هندستان ۽ بڻجي رهندو پاڪستان“، اسان کي ننڍي کنڊ ۾ جدا ملڪ بڻائڻ جي حقيقت کي سمجهڻو پوندو. وفاقي وزير چيو ته سرحد پار والاريل ڄمون ۽ ڪشمير ۾ ظلم جاري آهن، ظلمن ۽ ڏاڍ جي باوجود ڪشميري عوام جدوجهد جاري رکي آهي. ڪشميري هاڻي به نعرو لڳائي رهيا آهن ته اسان پاڪستاني آهيون ۽ پاڪستان اسان جو آهي. هن چيو ته مڪه مدينه جي هجرت ۽ ڀارت مان پاڪستان ڏانهن هجرت پنهنجي اندر سبق رکن ٿيُون، ڀارت مان پاڪستان هجرت جي وقت 12 لک ماڻهو سرحد پار ڪندي زندگي جي بازي هارائي ويا هئا، انهن 12 لک ماڻهن جي قربانين سان هي ملڪ ٺهيو، ٽرينن جون بوگيون هتي آيون ته لاشن سان سٿيل هيون. انهن ماڻهن پنهنجون ملڪيتون، گهر ۽ گهٽيون ڇڏي نئين وطن جي لاءِ سفر ڪيو هو، 1947ع جي هجرت ۾ عورتن به قربانين جا نه وسارڻ جوڳا داستان لکيا. هن چيو ته پاڪستان رمضان المبارڪ جي 27 هين رات وجود ۾ آيو، اها ان ڳالهه جي دليل آهي ته هن ملڪ کي ترقي ڪرڻي آهي ۽ قيامت تائين رهڻو آهي. هن چيو ته پاڪستان سدائين قائم رهڻ جي لاءِ ٺهيو آهي. وفاقي وزير چيو ته پاڪستان جي بنيادن ۾ شهيد جو مقدس رت شامل آهي، شهيدن جي رت جي لاڄ رکڻ اسان جي ذميواري ۽ فرض آهي. وفاقي وزير چيو ته پاڪستاني نوجوان پرعزم ۽ محنتي آهن، رنگ نسل ۽ فرقن کان هٽي ڪري ڪنهن به آفت جو گڏجي مقابلو ڪريون ٿا، اسان ڪنهن شيءَ جو ارادو ڪري وٺون ۽ پڪوپهه ڪري وٺون ته اسان کي ان هدف تائين پهچڻو آهي ته اسان کي ڪا به طاقت اوستائين پهچڻ کان نه ٿي روڪي سگهي. هن چيو ته پنجاب جي پٺتي پيل علائقي ميان چنون مان هڪ نوجوان ارشد نديم وڻ جي ڪاٺيءَ ٽوڙي پهرين جيولين تيار ڪئي، جڏهن هو لاهور آيو ته ان وٽ جوتا به نه هئا، ان نوجوان 2012ع جي پهرين يوٿ فيسٽيول ۾ راندين جي سمورين سرگرمين ۾ حصو ورتو، ان نوجوان پنهنجي قسمت کي آزمايو ۽ 2024ع ۾ پيرس جي اسٽيڊيم ۾ پاڪستان جو جهنڊو اُونچو ڪيو. وفاقي وزير چيو ته هن ملڪ ۾ تمام گهڻيون اميدون آهن، اسان کي انهن اميدن کي جاڳائڻ جي ضرورت آهي. هن چيو ته پهرين ليپ ٽاپ اسڪيم جي شروعات ڪئي وئي ته تعليمي ادارن جي شاگردن کي ميرٽ تي ليپ ٽاپ ڏنا ويا. ڪوويڊ دوران اسان جي معيشت ان جي لاءِ مستحڪم ٿي ته لکين ليپ ٽاپ ورڪ فرام هوم، آن لائين ايجوڪيشن ۽ غيررسمي تعليم جي لاءِ موجود هئا، اهي نه هجن ها ته اسان جي معيشت ويهي رهي ها. هن چيو ته دانش اسڪول تي به تنقيد ڪئي وئي، ايليٽ ڪلاس اسڪولن تي ڪنهن کي ڪو اعتراض نه هو. دانش اسڪول قائم ڪرڻ جو مقصد اهو هو ته يتيم ٻارن کي سڀ کان پهرين داخلا جو حق ڏنو وڃي، دانش اسڪول مان تعليم حاصل ڪندڙ هڪ شاگردياڻي ڪنگ ايڊورڊ ميڊيڪل يونيورسٽي ۾ تعليم حاصل ڪري رهي آهي. هن چيو ته هن ملڪ ۾ ڳالهيون ڪرڻ آسان آهي ۽ ڪم ڪرڻ مشڪل آهي، پاڪستان ۾ ٽيلينٽ جي کوٽ نه آهي، اسان کي ٽيلينٽ کي تسليم ڪرڻ ۽ موقعا فراهم ڪرڻ جي ضرورت آهي. هن چيو ته پنجاب ايجوڪيشن انڊومنٽ فنڊ شروع ڪيو ويو، ان جي لاءِ هڪ ننڍڙي سيڊ مني رکي وئي ته اسان کي مستحق شاگردن کي دنيا جي بهترين يونيورسٽين ۾ وڃڻ جو موقعو ڏيڻو آهي، اڄ به ان فنڊ مان ڪيترائي شاگرد اسڪالرشپس وٺي دنيا جي وڏين يونيورسٽين ۾ تعليم حاصل ڪري رهيا آهن. وفاقي وزير چيو ته انهن موقعن تي نوجوانن جو حق هو، اسان جي 60 سيڪڙو نوجوان آبادي آهي، صحيح پاليسين ۽ رخ سان اسان پنهنجي منزل حاصل ڪري سگهون ٿا. نوجوانن جي ڀلائي جي لاءِ ڏهاڪا اڳ ننڍا ننڍا قدم کنيا ويا ۽ اڄ جڏهن انهن جا نتيجا ڏسون ٿا ته حيران رهجي وڃون ٿا ڇو ته ان وقت جو لڳايل ٻوٽو هاڻي وڏي وڻ جي شڪل اختيار ڪري چڪو آهي. هن چيو ته اڄ به اسان جو ويزن نوجوانن جي لاءِ آهي، اسان پاڪستان جي نوجوانن کي سڄي دنيا ۾ موقعا فراهم ڪرڻ چاهيون ٿا. هن چيو ته گذريل چئن مهينن جي اندر اسان جي آءِ ٽي روانگي واپار ۾ ٽيڻ تي اضافو ٿيو، دنيا ۾ آءِ ٽي جي اندر گهٽتائي ٿي رهي آهي جڏهن ته پاڪستان ۾ آءِ ٽي جو شعبو ترقي ڪري رهيو آهي، اسان جا نوجوان آءِ ٽي ايڪسپرٽس ۽ نوجوان ليڊرز اڳتي وڌي رهيا آهن. هن چيو ته ڪيترو ئي ڪم نوجوانن پنهنجي طور تي ڪيو ۽ حڪومتن کي مجبور ڪيو ته اهي نوجوانن جي لاءِ ڪم ڪن. عطاءُ الله تارڙ چيو ته هنملڪ جي رخ ۽ معيشت کي صحيح ڪرڻ، آءِ ٽي انقلاب آڻڻ، راندين ۽ معياري تعليم کي فروغ ڏيڻ جي ضرورت آهي. وفاقي وزير چيو ته وزيراعظم محمد شهباز شريف ملڪ جي تريق جي لاءِ مسلسل ڪم ڪري رهيو آهي، گذريل ڪجهه مهينن جي ڪارڪردگي ڏٺي وڃي ته هڪ ڏينهن ۾ جيڪڏهن 15 اجلاس ٿين ٿا ته ان ۾ پنج اجلاس نوجوانن جي لاءِ هوندا آهن. هن چيو ته اسان آءِ ٽي، زراعت، تعليم ۽ راندين جي شعبن ۾ ترجيحن کي صحيح ڪري ڇڏيو ۽ نوجوانن کي موقعا فراهم ڪري ڇڏيا ته انشاءَ الله 2030ع تائين پاڪستان جي – 20 ۾ نظر ايندو، نوجوانن جي لاءِ صحيح پاليسين، صحيح رخ سان 2030ع تائين اسانجي – 20 ۾ پهچي سگهون ٿا، اهو ئي اسان جو نعرو آهي. هن چيو ته 2030ع تائين جي – 20 تائين پهچڻو آهي ته هن ملڪ جي 30 سالن کان گهٽ عمر جي 60 سيڪڙو آبادي کي پنهنجو ڪردار ادا ڪرڻو پوندو، اسان ايندڙ نسلن جي لاءِ هڪ بهتر پاڪستان ڇڏي وينداسين. هن چيو ته اسان گڏجي اتحاد ۽ تنظيم سان هن ملڪ جي خدمت ڪنداسين، هن ملڪ کي ان مقام تائين پهچائينداسين جنهن جو خواب قائداعظم محمد علي جناح ڏٺو هو. هن چيو ته 60 سيڪڙو نوجوان آبادي کي هن ملڪ کي اڳتي وٺي هلڻو آهي، هن ملڪ کي ان جو وڃايل مقام ڏيارڻو آهي، پاڪستان جو مستقبل نوجوانن جي هٿن ۾ آهي.

مضمون کا ماخذ : لاٹری ایپلی کیشنز کے فوائد

متعلقہ مضامین