معيشت جي ڊيجيٽائيزيشن کي يقيني بڻائڻ جي حوالي سان اهم قدم کنيا پيا وڃن، ايندڙ 5 سالن جي لاءِ هوم گرون اڪنامڪ پلان جو جلد اعلان ڪيو ويندو: وزيراعظم محمد شهباز شريف

اسلام آباد – 22 آگسٽ (اي پي پي) وزيراعظم محمد شهباز شريف چيو آهي ته معيشت جي ڊيجيٽائيزيشن کي يقيني بڻائڻ جي حوالي سان اهم قدم کنيا پيا وڃن، ايندڙ 5 سالن جي لاءِ هوم گرون اڪنامڪ پلان جو جلد اعلان ڪيو ويندو، ننڍي ۽ وچولي درجي جي ڪاروبارن ۽ زرعي پيداوار وڌائي ئي پاڪستان مثبت معاشي رخ ۾ اڳتي وڌي سگهي ٿو. اهڙن خيالن جو اظهار هن هاورڊ بزنس اسڪول جي شاگردن جي وفد سان ملاقات دوران ڪيو، وفد ۾ 9 ملڪن جا شاگرد ۽ شاگردياڻيون شامل هئا. وزيراعظم شاگردن کي پاڪستان اچڻ تي ڀليڪار ڪيو. وزيراعظم آفيس جي ميڊيا ونگ پاران جاري بيان موجب وزيراعظم محمد شهباز شريف شاگردن سان ڳالهائيندي چيو ته پاڪستان حڪومت اداراجاتي سڌارن جي ذريعي گورننس جي نظام کي بهتر بڻائڻ تي ڌيان ڏئي رهي آهي، ٻاهريان ۽ اندروني قرض معيشت جي لاءِ چئلينج آهي جڏهن ته معاشي استحڪام جي ذريعي ان چئلينج تي جلد ضابطو آڻي وٺنداسين، معيشت جي ڊيجيٽائيزيشن کي يقيني بڻائڻ جي حوالي سان اهم قدم کنيا پيا وڃن، فيڊرل بورڊ آف روينيو جي ڊيجيٽائيزيشن معيشت ۾ سڌارن طرف اهم ترين سنگ ميل آهي جنهن جي لاءِ عالمي شهرت رکندڙ ماهرن جون خدمتون حاصل ويون ويون آهن، ايف بي آر جي ڊيجيٽائيزيشن سان ٽيڪس بيس وڌائڻ ۾ مدد ملندي. هن چيو ته پاڪستان ۾ ڪاروباري برادري ۽ سيڙپڪارن جي لاءِ آساني پيدا ڪري رهيا آهيون، ڳاڙهي ڦيٿي جو خاتمو ڪري رهيا آهيون، خصوصي سيڙپڪاري سهولت ڪائونسل ان طرف هڪ اهم اڳڀرائي آهي، حڪومت جي ماپي کي گهٽ ڪرڻ ۽ خرچن ۾ گهٽتائي جي حوالي سان ڪم جي شروعات ڪئي وئي آهي، وفاقي وزارتن ۽ ادارن جي ڊائون سائيزنگ ۽ رائيٽ سائيزنگ تي ڪم جاري آهي. وزيراعطم چيو ته ماهرن سان گڏجي ايندڙ 5 سالن جي لاءِ هوم گرون اڪنامڪ پلان جو جلد اعلان ڪيو ويندو، اهڙين پاليسين تي گامزن آهيون جن جي ذريعي اشرافيه جي وسيلن تي پڪڙ گهٽ ٿئي ۽ وچولي ۽ غريب طبقن جي ماڻهن جي ڀلائي ٿي سگهي، واپاري خساري ۾ گهٽتائي جي حوالي سان ايڪسپورٽ ليڊ گروٿ جي پاليسي تي ڪم ڪري هيا آهيون. هن چيو ته پاڪستان قدرتي وسيلن سان مالامال آهي، ٿر ڪول توانائي جو وڏو خزانو آهي جنهن کي استعمال ۾ آڻي پاڪستان جي بجلي جون ضرورتون پوري ڪيون پيون وڃن، پاڪستان ۾ قيمتي ۽ ناياب پٿرن جي صنعت کي جديد رخن تي قائم ڪرڻ جي لاءِ ٺوس پلان ٺاهيو پيو وڃي، ننڍي ۽ وچولي درجي جي ڪاروبارن ۽ زرعي پيداوار وڌائي ئي پاڪستان مثبت معاشي رخ ۾ اڳتي وڌي سگهي ٿو، حڪومت ان حوالي سان ڀرپور قدم کڻي رهي آهي. هن چيو ته زرعي شعبي جي ترقي جي حوالي سان چيني مهارت مان فائدو حاصل ڪري رهيا آهيون، 1000 پاڪستاني شاگرد ۽ ريسرچ اسڪالرز چين ۾ جديد ٽيڪنالاجي تي ٻڌل زرعي تربيت حاصل ڪندا، حڪومتي ڪوششن سان پهريون ڀيرو ملڪ جي انفارميشن ٽيڪنالاجي سان واڳيل برآمدات 3.2 بلين آمريڪي ڊالرز کان وڌي وئي جيڪا خوش آئنده آهي، پاڪستان جي هڪ وڏي آبادي نوجوانن تي ٻڌل آهي جيڪو هڪ چئلينج به آهي ۽ موقعو به، ڀرپور ڪوشش آهي ته نوجوانن جي هڪ وڏي انگ جي لاءِ موقعن سان ڀرپور مستقبل هجي نوجوانن جي فني ۽ ٽيڪنيڪي تربيت اولين حڪومتي ترجيحن ۾ شامل آهي. وزيراعظم چيو ته چيني ڪمپني هواوي سان معاهدي تحت هر سال 2 لک پاڪستاني شاگردن کي آءِ ٽي ۽ ٽيلي ڪام جي شعبن ۾ تربيت ڏني ويندي، پنجاب ايجوڪيشن انڊومنٽ فنڊ جي طرز تي پاڪستان ايجوڪيشن انڊومنٽ فنڊ تي ڪم ڪيو پيو وڃي، دانش اسڪولز جو دائرو ملڪ جي ڏورانهن علائقن تائين ڦهلايو پيو وڃي. هن چيو ته دانش اسڪولز غريب شاگردن کي مفت ۽ اعليٰ معيار جي تعليم فراهم ڪري رهيا آهن جتي شاگردن جي قيام ۽ طعام جو مفت انتظام پڻ ڪيو وڃي ٿو، مختلف وزارتن ۾ اوورسيز پاڪستانين جي لاءِ ايڊوائيزري ڪائونسلز ڪم ڪري رهيون آهن، نوجوان اوورسيز پاڪستاني انهن ڪائونسلز جي ذريعي ملڪي ترقي ۾ پنهنجو ڪردار ادا ڪري سگهن ٿا، پرائيم منسٽر يوٿ پروگرام تحت نوجوانن جي ڀلائي جي لاءِ ڀرپور ڪم ڪيو پيو وڃي. شاگردن جي وفد اينٽريڪٽو سيشن ۾ شرڪت ۽ سوالن جو موقعو ڏيڻ تي وزيراعظم جا ٿورا مڃيا. ملاقات ۾ منصوبابندي واري وفاقي وزير احسن اقبال، تعليم واري وفاقي وزير خالد مقبول صديقي، اطلاعات ۽ نشريات واري وفاقي وزير عطاءُ الله تارڙ، پيٽروليم واري وفاقي وزير مصدق ملڪ، انفارميشن ٽيڪنالاجي ۽ ٽيليڪام واري مملڪتي وزير شزا فاطمه خواجه، ناڻي ۽ اوڳاڙين واري مملڪتي وزير علي پرويز ملڪ، وزيراعظم جي نوجوانن جي معاملن واري خاص معاون راڻا مشهود احمد ۽ اعليٰ سرڪاري آفيسرن شرڪت ڪئي.

مضمون کا ماخذ : کراچی لاٹری

متعلقہ مضامین